Mbrojtësi i Chelseas, Emerson Palmieri, është shumë pranë largimit nga londinezët. Lojtari i kombëtares italiane nuk po gjen hapësira në formacionin e Frank Lampard dhe duke marrë parasysh dhe kampionatin europian ai kërkon më shumë minuta lojë.
Sipas raportimit të “La Gazzetta dello Sport”, Palmieri mund të përfundojë te Napoli në merkaton e janarit. Edhe pse ai ka qenë një nga objektivat kryesorë të Interit, tashmë mundësitë janë më tepër që ai t’i bashkohet skuadrës së Gennaro Gattusos.
Drejtuesit napoletanë shpresojnë që të arrijnë një marrëveshje me Chelsean ashtu siç vepruan me Tiemoue Bakayokon, pra ta huazojnë lojtari deri në qershorin e vitit 2021. Megjithatë, fillimisht Napoli duhet të gjejë një zgjidhje për Faouzi Ghoulam para se të nënshkruajë me mbrojtësin e Chelseas.
Palmieri aktivizohet si mbrojtës i majtë, aty ku Hysaj ka luajtur në shumicën e ndeshjeve të këtij sezoni. Shkodrani është drejt largimit nga Napoli dhe ardhja e braziliano-italianit është sinjal i qartë i lëvizjeve konkrete. /abcnews.al
