Loading ...
Në fjalimin e mbajtur në Konferencën e Sigurisë në samitin e Natos, sekretari i përgjithshëm, Stoltenberg, kërkoi që vendet anëtare të rrisin shpenzimet në mbrojtje. Ai rikonfirmoi se Rusia mbetet rreziku kryesor i Aleancës ushtarake.
Sekretari i Përgjithshëm i NATO-s, Jens Stoltenberg, në samitin që po zhvillohet në Bruksel, ka mbështetur qëndrimin e Shteteve të Bashkuara. Duke folur në Konferencën e Sigurisë, ai i ka bërë thirrje shteteve anëtare të Aleancës së Atlantikut që të rrisin shpenzimet për mbrojtjen.
Jens Stoltenberg, sekretari i përgjithshëm i NATO-s: “Ne të gjithë kemi rënë dakord, që nuk kemi ndarje të barabartë të barrës në NATO sot. Disa aleatë shpenzojnë 2% të Prodhimit të Brendshëm Bruto, dhe disa të tjerë më shumë se aq për mbrojtjen, veçanërisht Shtetet e Bashkuara. Ndërsa aleatët e tjerë shpenzojnë shumë me pak”.
Më tej, Stoltenberg bëri thirrje që shtetet anëtare të qëndrojnë të bashkuar dhe jo të përçarë. Ndër të tjera, Sekretari i Përgjithshëm ritheksoi se rreziku dhe armiku kryesor i NATO-s mbetet Rusia. Megjithatë pranoi që ky shtet mbetet fqinj me disa anëtarë të Aleancës Ushtarake dhe ndaj nuk duhet të mbyllen kanalet e komunikimit.
“Ne nuk e njohim aneksimin e Krimesë, nuk njohim propagandën ruse, veprimet në hapësirën kibernetike, ndërhyrjen në zgjedhje. Ne pamë incidentin në Salisbury. Por nuk mendoj se këto janë argument për izolimin e Rusisë”, përfundoi Stoltenberg./abcnews.al
