Presidenti Ilir Meta ka kujtuar veprën e autorit të njohur Dritëro Agolli në ditën e tij të lindjes, ku mes rreshtash thumbon maxhorancën. Meta thotë se vepra e Agollit “Shkëlqimi dhe rënia e shokut Zylo”, është shumë prezente edhe në ditët e sotme pasi në administratën shtetërore i gjen të dy personazhet e saj, Zylon dhe Demkën. Kreu i shtetit shkruan se Agolli mungon fizikisht por do të jetë përherë në çdo raft librash.
“Dritëroi ynë dritëron gjithmonë! Thellësia e mendimit, këshillat e mençura, forca e karakterit, urtërsia, e në veçanti kurajoja për t’u ballafaquar me padrejtësinë janë një pasuri e madhe që ai na la të gjithëve, së bashku me kryeveprat artistike, ngahera aktuale, frymëzuese dhe shumë të dashura.
Dritëroi ishte një derë e hapur ku gjeje një mik të mençur e të gjendur. Ai ishte dhe do të mbetet i të gjithëve, prezent në çdo kohë me idetë e tij, në art, kulturë, letërsi dhe politikë, sepse forca e talentit, karakterit dhe fuqia e mendimit i buronte nga populli dhe madhështia e të qenit në radhë të parë njeri modest dhe i thjeshtë, pranë halleve e problemeve të bujkut, fermerit, punëtorit dhe shqiptarit patriot, gjithmonë i pari për t’u “përleshur” me padrejtësinë, arrogancën, megalomaninë, burokratizmin dhe presionet e pushtetit.
E kush do ta mendonte se “Shkëlqimi dhe rënia e shokut Zylo” do të ishte edhe sot kaq prezente si fabul në administratën shtetërore, ku ende e gjen edhe Zylon edhe Demkën. Sot në ditën e tij të lindjes, Dritëroi na mungon fizikisht të gjithëve. Por ai do të jetë përherë i gjallë midis nesh, në çdo raft librash, në kujtimet e paharruara që la pas dhe në çdo këshillë të vyer që na dha ne miqve të tij!”, shkruan Meta.
Kush janë dy personazhet që i referohet Meta: Shoku Zylo është një nëpunës i lartë në ministri kohën e Socializmit, i burokratizuar, një zyrtar i mbytur në shkresa, që i ka humbur lidhjet me jetën. Ndërkohë Demka është nëpunës i thjeshtë në ministri i cili i bindet për çdo gjë Zylos. Dikur njeri me talent, por me kohë e ka lënë rrugën e suksesit individual dhe i është nënshtruar vullnetit të eprorit./mv. abcnews.al
