Qumështi është burim i shkëlqyer i kalçiumit, kaliumit dhe vitaminës D, pasi ai i ofron organizmit shumë përfitime shëndetësore.
Disa preferojnë ta pijnë qumështin të ngrohtë dhe pjesa tjetër të ftohtë, por Agroweb na tregon se cila është mënyra më e mirë e konsumimit.
Sipas dietologëve nuk ka një matës ekzakt për një përgjigje të prerë, kjo pasi temperatura e qumështit (i ngrohtë apo i ftohtë) kur e konsumoni varet nga gjendja shëndetësore dhe shumë faktorë të tjerë.
Kur qumështi është i ngrohtë, ai ndihmon organizmin për një tretje më të lehtë. Laktoza që përmban qumështi shpërbëhet dhe ndihmon në parandalimin e problemeve të pakëndshme që vijnë nga mos tretja, siç është fryrja e stomakut apo edhe diarreja. Një filxhan me qumësht të ngrohtë para se të flini ndihmon për një gjumë më të qetë.
Ndërsa nëse vuani nga djegia në stomak atëherë qumështi i ftohtë ndihmon në lehtësimin e menjëhershëm të stomakut.
Përveç kësaj, konsumimi i qumështit të ftohtë pas ngrënies së vaktit ndihmon në parandalimin e aciditetit në stomak. Koha më e mirë për ta konsumuar atë është herët në mëngjes.
Pra, qumështin e ngrohtë apo të ftohtë duhet ta konsumoni bazuar në faktorët tuaj shëndetësorë. /abcnews.al
