Interi zhvilloi një ndeshje pozitive kundër Napolit në duelin e kthimit gjysmëfinal të Kupës së Italisë. 1-1 u mbyll ndeshja në “San Paolo”, por në finale u kualifikuan djemtë e Gattusos (fituan trofeun mbrëmjen e kaluar kundër Juventusit), pas fitores 0-1 në “San Siro”.
Tani është radha e kampionatit, aty ku Interi renditet në vend të tretë, dhe zikaltrit presin në shtëpi Sampdorian të dielën (21:45). Antonio Conte ka folur për PP Sport rreth gjendjes së skuadrës, objektivave të Interit dhe dyshes Alexis Sanchez-Christian Eriksen.
“Duhet të jemi gati për rifillimin e kampionatit. Nuk do të jetë e lehtë të luajmë çdo tre ditë në temperatura të larta. Duhet t’i reduktojmë në maksimum gabimet, teksa nuk është problem motivimi i lojtarëve.
Duhet të fitojmë ndeshjet, nuk kemi alternativa të tjera. Nevojitet punë, sakrificë, përpjekje dhe pasion. Mua nuk më mungon dëshira dhe ambicia, dua të rrisim nivelin tonë, këtë tentoj t’ua ngulis në mendje çdo ditë atyre që punojnë me mua.
⚽️ | TRAINING
Out on the pitch and looking ahead to #InterSampdoria ?
?? https://t.co/RJRNNRe1zi pic.twitter.com/oHftD6DdTE
— Inter (@Inter_en) June 15, 2020
Duhet të përballemi me vështirësitë që paraqet rrugëtimi ynë, duhet ta bëjmë me dëshirë diçka të tillë. Vetëm në këtë mënyrë rritemi dhe përmirësohemi. Jam krenar me mentalitetin që ka ky Inter, mos të harrojmë që nuk kemi pasur fat dhe jemi goditur nga mungesat.
Duam të fitojmë trofe, kështu që çdo lojtar duhet të rrisë nivelin e lojës, është shumë e rëndësishme kjo gjë. Shoh dedikim dhe dëshirë për të punuar te djemtë, kjo më gëzon dhe më bën krenar. Për fat të mirë, i kemi në dispozicion të gjithë lojtarët.
Sanchez? Alexis ndodhet në gjendje të mirë, kemi pasur mundësinë të punojmë edhe me Eriksen, në aspektin fizik dhe atë taktik. Jemi gati për ndeshjen e së dielës“, përfundon Antonio Conte. /abcnews.al
