Lokomotiva e Zagrebit po përgatitet për ndeshjen gjysmëfinale të Kupës së Kroacisë. Skuadra ku aktivizohen shumë shqiptarë, luan të shtunën në mbrëmje (20:15) jashtë fushe kundër Slaven Belupos.
Myrto Uzuni ndihet gati për këtë sfidë dhe kërkon me çdo kusht finalen e madhe. 24-vjeçari i kombëtares kuqezi, i cili ndodhej në super formë përpara ndërprerjes së futbollit, ka folur për sajtin zyrtar të klubit kroat rreth përballjes së fundjavës.
“Jam shumë i lumtur që jemi rikthyer në fushë. Të gjithëve na ka munguar futbolli. Kemi punuar shumë, shpresoj të vazhdojmë në nivelin që kemi qenë. Skuadra është fantastike, duhet të konfirmojmë veten në ndeshjet e ardhshme.
E kemi kualitetin për të dalë në finale, uroj të luajmë mirë dhe të fitojmë. Duam të rifillojmë aty ku e lamë, skuadra dhe unë personalisht. Dua të vazhdoj të shënoj gola, do lumturohesha shumë nëse shënoj dhe dërgoj Lokomotivën në finale“, thekson autori i 11 golave në këtë sezon. /abcnews.al
