Mario Gotze do të dalë lojtar i lirë në fund të sezonit dhe e ardhmja lidhet me Italinë. Fantazisti gjerman ka një dëshirë për të provuar emocionet e Serie A, aty ku ka disa klube të interesuara për të. 27-vjeçari nuk është më ai lojtari i dikurshëm që shkëlqente me Dortmund dhe Gjermaninë, por kampionati italian mund ta “ringjallë”.
Lothar Matthaus e shtyn Gotze drejt largimit nga verdhezinjtë. Legjenda gjermane nuk i kursen kritikat për lojtarin që shënoi për “Pancerat” golin e fitores në finalen e Kupës së Botës përballë Argjentinës në vitin 2014.
“Mendoj se ka mbaruar koha e Gotze te Dortmundi. Do të befasohesha shumë nëse bashkëpunimi i tyre vazhdon”, deklaron 59-vjeçari për Sky Sport Germania. Matthaus vazhdon me tej dhe i sugjeron lojtarit transferimin në Serie A.
“Stili i Marios nuk përputhet me lojën e Dortmundit. Nuk është më aq i shpejtë për të luajtur në këtë skuadër dhe më skuadrat më të mëdha në Evropë. Kalimi te Bayerni në të kaluarën nuk qëlloi pozitiv për të. Nuk ia doli të rikthehet në nivelin e tij më të mirë edhe pasi u rikthye te Dortmundi.
Mario ka nevojë për të gjetur skuadrën e duhur dhe trajnerin e duhur që ndërton lojën rreth tij. Serie A mund të jetë shumë e përshtatshme për të. Futbolli në Itali nuk është kaq i shpejtë dhe ai mund të përfitojë”, deklaron Matthaus. /abcnews.al
