Trajneri i Luftëtarit, Nikolin Çorçlli, ka folur për emisionin “Gol pas goli” në Supersport, aty ku pranoi se kishte besim të madh për një rezultat pozitiv në transfertë kundër Teutës.
BESIMI – “Që në fillim, kishim besim të jashtëzakonshëm, personalisht unë, ndoshta ishte një ndjesi e brendshme e imja. U përshtatëm mirë me sistemin e lojës dhe besimi ishte maksimal. Në momentin që Lika gjuajti, e dija që është gol dhe paralajmërova gjithë pankinën për të festuar”.
SURPRIZAT – “Nga java në javë, do të shihni shumë surpriza, këtu kemi një skuadër me çuna të rinj, të jashtëzakonshëm. Mungon vetëm mbështetja nga të gjithë krahët, strategjia për të pasur një skuadër solide dhe që të ketë pretendimet e duhura”.
LUHATJET – “Kemi pasur oshilacione, kemi krijuar një grup ndryshe. Lojtarët nuk ishin të stabilizuar në pozicionet e tyre, prandaj kishim luhatje. Por mos harroni që kemi luajtur kundër Partizanit, Tiranës, Kukësit. Jam i bindur që tani dhe në vazhdim, nuk do të kemi luhatje. I kam thënë skuadrës, jeni lojtarë të rritur, nuk lejohet asnjë hap fals. Jam i bindur se te kjo skuadër, do të shihni shumë surpriza, këtë gjë e garantoj”.
TOLERIMET – “Unë personalisht, shoh punën time, nuk tolerojmë. Ne impenjohemi maksimalisht, nuk i hap rrugë askujt. Kemi strategji të qartë dhe nga kjo strategji e jona, duhet të mësojnë të gjithë. Përgatisim dhe rrisim lojtarët vendas.
STRATEGJIA – “Unë flas në aspektin teknik, çfarë na takon neve si pjesëtar të stafit teknik. Idetë e mia i kam të qarta, për të bërë atë punë që kam menduar të bëjmë. Që në fillim e kam ditur se do të krijoj një grup të ri. Edhe nëse ne biem një Kategori më poshtë, strategjia jonë do të funksionojë”./abcnews.al
