Loading ...
Tensionet mes SHBA dhe Iranit janë përshkallëzuar pas sulmeve të reja ushtarake në ngushticën e Hormuzit si dhe në zonat rreth saj. Forcat amerikane goditën dy lëshues raketash në ishullin Larak, pranë Bandar Abbasit. Sipas Gardës Revolucionare Islamike të Iranit (IRGC), sulmi shkaktoi dy viktima dhe dy të plagosur.
IRGC deklaroi se do të ketë “përgjigje dhe ndëshkim” dhe pretendoi gjithashtu se kishte rrëzuar një dron amerikan mbi ngushticën e Hormuzit. Komanda Qendrore e SHBA-së (CENTCOM) e përshkroi operacionin si një “veprim të kufizuar dhe të saktë” kundër forcave iraniane që dyshohet se po përgatiteshin për vendosjen e minave dhe përbënin një kërcënim të menjëhershëm për trafikun detar, raporton BBC.
Në kundërpërgjigje, mediat iraniane raportuan se IRGC kishte lëshuar raketa balistike drejt bazave amerikane King Hussein dhe al-Azraq në Jordani. Ushtria jordaneze tha se kishte interceptuar tetë raketa në orët e para të mëngjesit.
Sulmi amerikan në Larak është goditja e parë e njohur ndaj Iranit që nga fundi i korrikut, kur presidenti amerikan Donald Trump kishte pezulluar fushatën e rinovuar ushtarake kundër Teheranit.
Larak Island ndodhet pranë Bandar Abbasit dhe në një pozicion strategjik në ngushticën e Hormuzit, një prej rrugëve më të rëndësishme detare për transportin global të naftës.
Presidenti iranian Masoud Pezeshkian deklaroi se Irani nuk kërkon luftë, por do t’u përgjigjet në mënyrë vendimtare sulmeve. Ndërkohë, zëdhënësi i IRGC-së, Hossein Mohebbi, e cilësoi sulmin amerikan si një “gabim strategjik dhe fatal” dhe paralajmëroi pasoja ekonomike dhe ushtarake për SHBA-në.
Përshkallëzimi vjen në një kohë kur trafiku detar në Hormuz mbetet nën tension të madh. Presidenti Trump kishte deklaruar javën e kaluar se minat e vendosura nga Irani në ngushticë ishin neutralizuar ose hequr dhe kishte paralajmëruar se çdo përpjekje e re për vendosjen e minave do të goditej.
Pas sulmit, Trump publikoi në Truth Social edhe video të dukshme të gjeneruara me inteligjencë artificiale, duke përfshirë një video që pretendonte se tregonte Kharg Island, një qendër e rëndësishme e eksporteve iraniane të naftës, duke shpërthyer./abcnews.al
