Loading ...
Kuba ka dënuar zgjatjen e embargos amerikane, e cila është në fuqi prej më shumë se 60 vitesh, duke akuzuar Uashingtonin se po përpiqet të dobësojë ekonomikisht ishullin.
Në vitin 1962, administrata e presidentit John F. Kennedy përdori Aktin e Tregtisë me Armikun për të vendosur embargon tregtare ndaj Kubës. Shtetet e Bashkuara e kanë zgjatur tashmë masën deri në shtator 2027.
Ministri i Jashtëm kubanez, Bruno Rodríguez, reagoi në rrjetin social X, duke deklaruar se me zgjatjen e embargos, “Uashingtoni po këmbëngul në qëllimin e tij për të mbytur një komb të tërë”. Ai e akuzoi gjithashtu SHBA-në për ndjekjen e një “politike gjenocidale” ndaj Kubës.
Zgjatja e embargos vjen në një periudhë të vështirë për ekonominë kubane. Vendi po përballet me ndërprerje të shpeshta të energjisë elektrike, mungesa të produkteve bazë dhe rënie të turizmit, një prej burimeve kryesore të të ardhurave.
Që prej vitit 1978, presidentët amerikanë, si republikanë ashtu edhe demokratë, e kanë rinovuar çdo vit Aktin e Tregtisë me Armikun.
Presidenti Donald Trump e ka cilësuar Kubën si një “kërcënim të jashtëzakonshëm” për sigurinë kombëtare të SHBA-së dhe ka kërcënuar vazhdimisht se do të marrë masa për ta vendosur ishullin nën kontrollin amerikan.
