Messi, mesazh prekës pas vdekjes së të atit: Nuk e di sa gjatë do të vazhdoj të luaj

Lionel Messi ka thënë se nuk është i sigurt se për sa kohë do të vazhdojë të luajë futboll, teksa publikoi një mesazh prekës pas vdekjes së babait të tij.

Babai i Messit, Jorge, ishte 68 vjeç kur ndërroi jetë javën e kaluar, pas një sëmundjeje të gjatë.

Jorge kishte qenë agjenti i sulmuesit argjentinas që kur Messi ishte vetëm 14 vjeç dhe e kishte shoqëruar gjatë gjithë rrugëtimit të tij, deri në shndërrimin në një prej futbollistëve më të mëdhenj të historisë së këtij sporti.

“Nuk e di çfarë do të bëj pa ty”, shkroi Messi, 39 vjeç, në rrjetet sociale.

“Nuk e di si do të vazhdoj. Dikur thjesht luaja futboll dhe tani, sinqerisht, nuk jam aspak i sigurt nëse do të vazhdoj ta bëj këtë edhe për shumë kohë.Ti ishe pranë meje që nga fillimi; kishte mbetur kaq pak deri në fund. Pse nuk munde të qëndroje edhe pak më gjatë, që ta përfundonim bashkë?” shton ai.

Messi ishte kapiten i Argjentinës në triumfin e Kupës së Botës në vitin 2022 dhe e udhëhoqi skuadrën deri në finalen e Botërorit 2026, ku Argjentina humbi 1-0 ndaj Spanjës, përpara se të rikthehej te skuadra e tij e klubit, Inter Miami.

Pas ndarjes nga jeta të Jorge-s, i cili ndërroi jetë në një spital në qytetin e tij të lindjes, Rosario, Messi u rikthye në shtëpi së bashku me familjen. Ceremonia private mortore u zhvillua të dielën në një varrezë në qytetin e Perezit, në periferi të Rosarios.