Loading ...
Policia e Cërrikut ka goditur një rast të krimeve kundër mjedisit, ku gërryerja e paligjshme e shtratit të lumit Devoll dyshohet se ka shkaktuar devijimin e rrjedhës së lumit dhe ka rrezikuar përmbytjen e tokave bujqësore në fshatin Gostimë.
Në kuadër të operacionit u arrestuan dy punonjës të subjektit që kryente aktivitetin e paligjshëm, si edhe një shtetas për ndërtim pa leje. Ndërkohë, administratori 22-vjeçar i subjektit është shpallur në kërkim.
Sipas hetimeve, subjekti gërryente shtratin e lumit me mjete të rënda jashtë koordinatave të përcaktuara në lejen që dispononte, duke devijuar rrjedhën e Devollit dhe duke krijuar rrezik për përmbytjen e tokave bujqësore në zonën e Gostimës.
Gjatë operacionit policia sekuestroi një ekskavator dhe një kamion teknologjik që përdoreshin për kryerjen e kësaj veprimtarie të kundërligjshme.
Përveç procedimit penal ndaj personave të përfshirë, subjekti është ndëshkuar edhe me masa administrative nga strukturat kompetente të IKMT-së dhe IMT-së.
Nga verifikimet rezultoi gjithashtu se një prej të arrestuarve kishte ndërtuar pa leje pranë zonës ku ushtronte aktivitetin subjekti. Ndërkohë, policia vijon punën për kapjen e administratorit të shpallur në kërkim dhe për dokumentimin e plotë të kësaj veprimtarie të paligjshme.
