Loading ...
Deri tani ka qënë një turne plot ulje dhe ngritje. Për momentin Belgjika ndodhet në majë të arritjeve të saj pas fitores 4-1 kundër SHBA në 1/8 e “Botërorit 2026”.
Edhe optimizmi është amplifikuar, por Rudi Garcia dhe të besuarve të tij iu duhet një tjetër paraqitje e madhe, pasu në çerekfinalen e turneut do të sfidojnë Spanjën.
Belgjika vjen në këtë përballje me pak kuota sipas parashikimeve, por trajneri i saj nuk ndan të njëjtin mendim.
“E dimë se po përballemi me një nga ekipet favorite dhe e njohim forcën e tyre, si individuale ashtu edhe kolektive, një forcë që e kanë ruajtur prej 15 apo 20 vitesh tashmë. Por statistikat janë bërë për t’u thyer dhe ne do të bëjmë çmos për të shënuar. Jemi skuadra e dytë më efikase në sulm në këtë Botëror. Të gjithë flasin për eliminimin tonë, por ne mund t’ia dalim mbanë.”
Në ndeshjen e fundit, kundër SHBA, Garcia surprizoi të gjithë me zgjedhjet e tij në formacion. Por ndaj Spanjës, ai e di që do t’i duhet i gjithë talenti dhe mbi të gjitha eksperienca. Për këtë, titullar pritet të kthehet sërish de Bruyne, që do të ndihmojë manovrat sulmuese për këmbët e Doku, Trossard dhe De Ketelaere, sërish në formacion. Po ashtu, Vanaken merr sërish besim në mesfushë në krah të të palodhurit Telemans. Një mungesë e madhe për Belgjikën është Onana, që e ka mbyllur përpara kohe Botërorin pas dëmtimit të rëndë në gju.
