Loading ...
Presidentja e përkohshme e Venezuelës, Delcy Rodriguez, ka kërkuar nga SHBA-ja të heq të gjitha sanksionet e vendosura ndaj vendit të saj.
Këto komente erdhën gjatë një takimi në Karakas të presidentes Rodriguez me një delegacion amerikan të udhëhequr nga Kyle Haustveit, një zyrtar nga Zyra e Energjisë Fosile dhe Menaxhimit të Karbonit e Departamentit të Energjisë të SHBA-së.
“Ne këmbëngulim që presidenti Trump t’i ndërpresë sanksionet ndaj Venezuelës në mënyrë që të gjitha investimet të zhvillohen plotësisht”, tha Rodriguez.
Ajo tha se ata kanë pjekurinë e nevojshme për të krijuar bashkëpunim të fortë me Washingtonin në sektorin e hidrokarbureve dhe shprehu shpresën për krijimin e një partneriteti afatgjatë në fushën e energjisë.
“Ne përsërisim nevojën për të ecur përpara drejt një Venezuele pa sanksione, si një mjet për t’u ofruar siguri ligjore institucionale investitorëve që vijnë në vendin tonë, një mjedis ku atyre u garantohet investim i qëndrueshëm me kalimin e kohës dhe një perspektivë që shikon përpara”, shkroi Rodriguez edhe në rrjetin social amerikan X.
Në takim morën pjesë edhe e ngarkuara me punë e SHBA-së në Venezuelë, Laura Dogu, ministrja e Hidrokarbureve e Venezuelës, Paula Henao, presidenti i kompanisë shtetërore të naftës (PDVSA), Hector Obregon, zv/presidenti për Ekonominë, Calixto Ortega dhe zv/ministri i Jashtëm për Amerikën e Veriut, Oliver Blanco.
