Loading ...
Irani ka paralajmëruar për hakmarrje shumë më shkatërruese nëse Shtetet e Bashkuara dhe Izraeli godasin objektiva civile, raportoi media shtetërore. Në përgjigje të presidentit amerikan Donald Trump, një zëdhënës i shtabit qendror të Gardës iraniane tha se sulmet do të jenë më të rënda dhe të përhapura gjerësisht.
Deklarata erdhi pasi Donald Trump përdori një gjuhë të rëndë ndaj Iranit, teksa i kujtoi ultimatumin e tij për të hapur Ngushticën e Hormuzit. Ai tha se Shtetet e Bashkuara do të shkatërrojnë objektet energjetike të Iranit nëse Rruga tregtare nuk është e lirë deri të Martën.
Teksa i quajti liderët iranianë bastardë të çmendur, Trump përdori fyerje dhe përmendi Islamin në të njëjtin postim në rrjetet sociale. Ndërkohë mediat ndërkombëtare raportojnë se Irani dhe Shtetet e Bashkuara kanë marrë një draft propozimi që kërkon një armëpushim 45-ditor dhe rihapjen e Ngushticës së Hormuzit si një mënyrë e mundshme për t’i dhënë fund luftës.
Propozimi vjen nga ndërmjetësuesit egjiptianë, pakistanezë dhe turq që punojnë për të ndaluar luftimet, sipas dy zyrtarëve që folën në kushte anonimiteti për të diskutuar negociatat private.
Ata shpresojnë që dritarja 45-ditore do të ofrojë kohë të mjaftueshme për bisedime të gjera midis vendeve për të arritur një armëpushim të përhershëm. Pavarësisht këtij zhvillimi, sulmet në rajon nuk janë ndalur. Kreu i inteligjencës për Gardën Revolucionare paraushtarake të Iranit, Gjeneral Major Majid Khademi u vra të hënën në një sulm.
Garda fajësoi Shtetet e Bashkuara dhe Izraelin për sulmin dhe u zotua për hakmarrje. Izraeli u përball gjithashtu me goditje nga Teherani, ndërsa Kuvajti tha se ndihmësit mjekësorë trajtuan gjashtë persona të lënduar pasi mbetjet e një rakete ranë mbi një zonë banimi. Arabia Saudite tha pa dhënë hollësi se shkatërroi dronë iranianë gjatë sulmeve të hënën./abcnews.al
