Loading ...Një tragjedi ka ndodhur ditën e djeshme në Vjenë, ku disa punëtorë humbën jetën në vendin e tyre të punës, në një kantier ndërtimi në Alsergrund.
Mes viktimave u raportua se ishin tre shqiptarë të Kosovës. Shembja e skelave ndodhi në një ndërtesë të vjetër të qytetit ku pjesa më e madhe e arkitekturës daton nga shekulli i 19-të.
Gazetarja e Klan Kosova Gremisa Latifi tha se familjarët e viktimave janë në gjendje të rëndë emocionale. Ajo shtoi se viktimat, Pajtim Bajrami dhe Istref Zeka kishin më shumë se 15 vite që jetonin në Vjenë, dhe trupat e tyre pritet të prehen në Kosovë, ndërsa familjarët po bashkëpunojnë me institucionet për procedurat ligjore.
“Kemi pasur mundësi të komunikojmë me familjarët e viktimave dhe gjendja e tyre është e rëndë. Familjarët e Istref Zekës nga Istogu thanë se më së shumti e ka përjetuar mamaja e tij, ndërkohë që deri tani s’ka shkuar asnjë që ta tërheqë trupin.
Pajtim Bajrami është nga Klinasi dhe patëm mundësi të bisedojmë me djemtë e axhallarëve të tij. Viktima e katërt është nga Bosnja. Për pjesën e dokumentacionit, familjarët nuk e dinë nëse kanë ose jo, por Pajtim Bajrami dhe Istref Zeka kishin më shumë se 15 vite që jetonin në Vjenë.
Familjarët janë në koordinim me institucionet dhe kanë shkuar për të kryer procedurat ligjore dhe dokumentet. Viktimat i janë nënshtruar autopsisë dhe trupat e tyre do të prehen në Kosovë.”
