Loading ...
Ambasada e Republikës së Shqipërisë në Emiratet e Bashkuara Arabe ka njoftuar se autoritetet vendase po planifikojnë hapjen graduale të hapësirës ajrore dhe nisjen e fluturimeve fillimisht me disa destinacione, deri në rikthimin e plotë të operimeve.
Sipas njoftimit zyrtar, rifillimi i fluturimeve në Abu Dhabi dhe Dubai pritet të ndodhë shumë shpejt, ndërsa procesi do të zhvillohet në mënyrë të kontrolluar dhe të fazuar.
Ambasada u sugjeron të gjithë shtetasve shqiptarë që ndodhen aktualisht në pritje të rifillimit të fluturimeve që të kontaktojnë sa më parë agjencitë e udhëtimit ku kanë rezervuar biletat, me qëllim konfirmimin e itinerareve dhe marrjen e informacionit të përditësuar mbi datat dhe kushtet e udhëtimit.
Autoritetet e Emirateve kanë bërë të ditur se hapja do të nisë me disa destinacione të përzgjedhura, ndërsa rikthimi i plotë i fluturimeve do të realizohet në një fazë të dytë.
Ambasada thekson rëndësinë e komunikimit të vazhdueshëm me agjencitë përkatëse dhe ndjekjen e njoftimeve zyrtare për çdo zhvillim të ri lidhur me lëvizjen ajrore nga dhe drejt Emirateve të Bashkuara Arabe.
