Loading ...Nga Vlora në Tiranë! Pas udhëtimit të kryeministrit Edi Rama në Vlorë për ta takuar, ishte radha e Ivanka Trump, vajzës së presidentit Donald Trump për t’ia kthyer vizitën.
Në mbrëmjen e së enjtes, ajo ndaloi përpara kryeministrisë, ku bëri një vizitë në institucion së bashku me kreun e ekzekutivit.
Gjatë paradites, Ivanka Trump iu drejtua zonës së Zvërnecit, një prej pikave me interes të veçantë natyror e turistik në jug të vendit, e jo më pak larg optikës së saj është zona e Portonovës.
Me vizitat e saj është bërë i qartë interesi i veçantë i vajzës dhe dhëndrrit të presidentit Trump për Vlorën, e më konkretisht për Sazanin dhe Zvërnecin.
Mbrëmjen e së mërkurës, kryeministri Rama udhëtoi drejt Vlorës për të darkuar me vajzën e presidentit Trump dhe një grup arkitektësh ndërkombëtarë.
Biseda u përqendrua në projektet dhe idetë e reja të zhvillimit, të lidhura me investime strategjike dhe vizionin urbanistik në zonën e Vlorës.
Pas darkës, kryeministri Rama dhe Ivanka Trump u larguan me automjet në drejtim të Orikumit.
Vizita e Ivankës dhe bashkëshortit të saj Jared Kushner lidhen drejtpërdrejtë me projektet e pritshme zhvillimore në qytet dhe zonat përreth, me theks të veçantë në Zvërnec dhe Ishullin e Sazanit, të konsideruara si zona me potencial të lartë strategjik dhe turistik.
Vlora, si një prej portave kryesore natyrore të jugut, pritet të marrë një forme te re, pasi do te investohen mbi 1 miliardë dollarë.
