Loading ...
Më të mirin nuk e kanë pasur në dispozicion që nga fillimi. Boston Sëlltiks po luan këtë sezon pa kapitenin Xhejzën Tatëm, e ndonëse kjo ka prishur shumë punë, sërish ish-kampionët e NBA-së kanë refuzuar të dorëzohen.
Kjo u tregua jo pak në suksesin e fundit, arritur në Arenën e Indianapolisit, ndaj ekipit vendas Indiana Pejsërs. Triumfi ishte I thellë, 140-122, dhe është e qartë se rekordmenët e titujve kanë atë që në sport quhet “thellësi”, pra potencial në formacionin titullar dhe në stol.
Rolin udhëheqës e mori Xhejlën Braun, pra ai të cilit I takon, duke shënuar 30 pikë, e duke shtuar 3 topa në tabela, 4 asistë e sidomos 4 vjedhje topi.
Krah tij edhe Priçërd me 29 pikë e 9 topa në tabela, Hauzer me 23 pikë dhe Uajt me 21 pikë e 6 asistë. Indiana vendase bëri shumë gabime sidomos në mbrojtje, por edhe në gjuajtjet për tri pikë, ndonëse nuk shënoi pak.
Sëlltiksat ishin më lart nga distanca, duke realizuar 20 nga 39 tripikëshat, me një mesatare shumë të mirë gati 50 për qind.
Edhe pse ishin në humbje me 15 pikë, sërish yjet e Bostonit reaguan dhe mbeten pretendentë për titull, duke qenë në vend të tretë në Konferencën Lindore me 19 fitore e 11 humbje.
Kur mund të kthehet Tatëm? Kjo ende nuk dihet, flitet për në shkurt apo mars, deri në fillim të plej ofit. Pra, rekordmenët e titujve mund ta kenë kapitenin kur të luftohet për trofeun.
