Loading ...Për të katërtin vit radhazi, në liqenin e Dibrës u zhvillua gara e peshkimit sportiv “Krap Kup”. Në këtë edicion morën pjesë 20 ekipe nga disa qytete të vendit dhe rajonit. Peshkimi zgjati 72 orë pa ndërprerje, me ekipe të përbëra nga tre persona secili.
Gara u zhvillua sipas disiplinës moderne të peshkimit të krapit, që kërkon pajisje dhe përgatitje profesionale. Fitues i këtij viti u shpall ekipi “Stater” nga Struga me një peshk 13.315 kg. Vendi i dytë shkoi për ekipin dibran “Retro Tea” dhe i treti për ekipin “Season”.
Rregulli kryesor i garës është “Peshko dhe lësho” – peshqit rilëshohen në ujë pas matjes. Organizatori Beli Haliti theksoi në “ABA e Mëngjesit” rëndësinë e ruajtjes së ekosistemit dhe promovimit të turizmit sportiv. Fituesi Fisnik Malo ndau emocionet dhe sfidën që përjetoi gjatë garës. Të gjithë pjesëmarrësit qëndruan në tenda kampingu dhe u kujdesën për ushqimin e tyre gjatë gjithë qëndrimit. Përpara nisjes, sipas traditës, organizohet një drekë e madhe mikpritëse.
Gara nuk është vetëm për trofe, por një mënyrë për të bashkuar njerëz me pasione të përbashkëta. Peshkimi sportiv po kthehet në një atraksion të rëndësishëm për zonën. Në këtë liqen pritet të organizohen edhe aktivitete të tjera të ngjashme në të ardhmen. “Krap Kup” tashmë është një traditë që rritet çdo vit, duke sjellë turizëm, sport dhe natyrë në një të vetme.
