Loading ...
Kjo gjë pritej, por shkoi më bukur edhe sesa mendohej. Anis Mehmeti ishte lojtari i dytë më i mirë i javës në kategorinë e dytë angleze, pas paraqitjes së tij të shkëlqyer këtë të shtunë.
Vetë faqja zyrtare e ligës Championship, e vendosi yllin ofensiv shqiptar në formacionin e ndeshjeve të kësaj jave, i vetmi lojtar i Bristol Sitit që ia doli.
Njëzetekatërvjeçari ishte i papërmbajtshëm në pjesën e parë në fushën e Shefild Uensdit, në fitoren 3-0, duke detyruar fillimisht kundërshtarët që të shkaktonin autogol, pastaj duke dhënë një asist tepër të saktë për rrjetën e dytë nga Jakobsen, ndërsa kryeveprën e përfundoi në 38’ me golin personal.
Të mos harrojmë se ai goditi edhe shtyllën.
Për të gjitha këto, faqja zyrtare e Championshipit i dha notën 8.9, që është e dyta më e lartë e javës së pestë, pas 10-ës absolute të merituar nga ylli i Ipsuiçit, Xhejdën Filoxhin, që shënoi 3 gola.
Mehmeti ka qenë krejt I veçantë këtë sezon, me tri rrjeta e dy asistë në pesë ndeshje, me vlerësime të larta, duke qenë më i miri i Bristol Sitit deri tani.
Skuadra e tij është në vend të tretë në renditje, me diferencën e golave më të mirë në ligë dhe shanset janë të mëdha për t’u ngjitur në Premier.
Gjithsesi, që nga qershori 2023, ylli I lindur në Londër nuk është thirrur në kombëtare, por shpreson që trajneri Silvinjo të ndërrojë mendjen pikërisht për sfidën kundër Serbisë.
