Loading ...
Po presin një Ardon Jashari e ndonjë yll tjetër, por njeriu që kanë në stol e ka nisur transformimin. Të paktën kështu kuptohet gjendja e Milanit pas fitores 4-2 ndaj Liverpulit në miqësoren e luajtur në Hong Kong.
Gati 50 000 spektatorë në stadiumin “Kai Tak Sports Park” padyshim që patën çfarë të shikonin, dhe nuk u penduan për biletën e blerë.
Impianti thuajse u mbush plot dhe kjo shifër tifozësh është një rekord.
Milani I trajnerit Masimiliano Alegri, dhe I drejtorit sportiv, Igli Tare, kaloi I pari në epërsi që në 10’ kur shënoi ylli ofensiv portugez, Rafael Leao, që nderoi kujtimin e patriotit dhe shokut të tij, Diogo Zhota, ish-lojtarit të Liverpulit, që humbi jetën pak ditë më parë në aksident automobilistik.
Kampionia e Anglisë barazoi në 26’ falë hungarezit Soboslai, dhe me këtë rezultat u mbyll pjesa e parë. Pas pushimit, kuqezinjtë zbatuan taktikën alegriane, mbrojtje e fortë dhe kundërsulm I shpejtë duke marrë frytet.
Loftus-Çik, një anglez, dhe sulmuesi zviceran Okafor shënuan në 52’ e 59’ duke mbyllur praktikisht ndeshjen.
Patën vetëm vlerë statistikore rrjetat për 3-2 nga Kodi Gakpo në 93’ dhe sërish Okafor për 4-2 në minutën e katërt shtesë.
Liverpuli bëri më shumë, mbajti topin 67 për qind e pati dyfishin e gjuajtjeve, por italianët ishin më konkretë.
Gjithsesi, kjo ishte një miqësore, ndërsa sezoni do të jetë diçka tjetër.
