Loading ...Në 24 orët e fundit në vend janë raportuar 18 vatra zjarri, nga të cilat 2 janë aktive dhe 2 janë nën monitorim.
Sipas ministrisë së Mbrojtjes vatrat janë evidentuar në bashkitë Bulqizë, Dibër, Rrogozhinë, Përmet, Pogradec, Sarandë, Vlorë, Lezhë, Mirditë, Kurbin, Kuçovë, Berat, Librazhd, Fier dhe Malësi e Madhe.
Aktualisht mbeten aktive vatrat në liqenin e luleve pjesë e Parkut Kombëtar Lurë ku po vijon puna për shuarjen e zjarrit të rënë në një sipërfaqe pyjore me pisha dhe livadh.
Edhe në fshatin Zambish të Rrogozhinës flakët e rëna në një sipërfaqe me dushqe nuk janë shuar ende. Forcat operacionale po punojnë për fikjen përfundimtare të zjarrit.
Ndërkohë vatra e zjarrit mes midis fshatrave Skuraj dhe Gallatë në Milot po mbahet në monitorim. Ndërkohë që një sipërfaqe prej rreth 23 ha është djegur.
Në monitorim po mbahet dhe vendi I quajtur “Mal Plak” në bashkinë e Librazhdit pasi sipas ministrisë së Mbrojtjes vatra ka intensitet të ulët.
Zjarret kanë rënë kryesisht në sipërfaqe me shkurre dhe bimësi, ku si pasojë janë djegur rreth 79 hektarë. Në një rast, në fshatin Tarazh në Mirditë zjarri ka rënë në një shtëpi private ku u dogj kuzhina dhe salloni i shtëpisë. Shkaku i rënies së zjarrit është i panjohur.
Sipas Institutit të Gjeoshkencave rrezik “i lartë” për zjarre paraqitet në qarqet Lezhë, Tiranë, Elbasan, Fier e Berat dhe rrezik “i moderuar” në të gjitha qarqet e tjera.
/abcnews.al
