Një grua ka sjellë në jetë fëmijën e saj në një varkë emigrantësh në tentativë për të arritur ishujt Kanarie në Spanjë.
Fëmija është i gjinisë mashkull dhe u soll në jetë këtë të mërkurë. Pamjet bënë xhiron e rrjetit teksa dhjetëra emigrantë ndodheshin në varkën ‘ e shpresës’.
Për fat të mirë, nëna dhe foshnja u transportuan me një helikopter shpëtimi detar dhe sipas burimeve nga Shërbimi i Shpëtimit Detar, nëna dhe foshnja ishin në “shëndet të dukshëm të mirë”. Ata u transferuan në Spitalin “Doctor José Molina Orosa” në Lanzarote për kujdes mjekësor më të specializuar.
Varka po transportonte rreth 60 persona, përfshirë 14 gra dhe katër të mitur. Grupi po udhëtonte në përpjekje për të arritur në Ishujt Kanarie, një itinerar i zakonshëm, por shumë i rrezikshëm për emigrantët që përpiqen të hyjnë në Europë. / abcnews.al
