Administrata e presidentit amerikan Joe Biden së shpejti do të shpallë paketën e fundit të ndihmës për Kievin në kuadër të Iniciativës për Asistencën e Sigurisë së Ukrainës (USAI), duke përdorur fondet e mbetura të destinuara për blerjen e armëve të reja, thanë dy burime të njohura me situatën. Paketa, me vlerë rreth 1.2 miliardë dollarë, përfshin sisteme përgjuese të raketave anti-ajrore dhe municione artilerie, tha një burim i tretë, ndërsa informacione më të sakta mbi përmbajtjen e paketës priten në ditët në vijim, raportoi Reuters.
Kjo paketë ndihme mund të jetë një nga hapat e fundit që SHBA ndërmerr në ofrimin e ndihmës direkte ushtarake për Ukrainën përpara se ajo të marrë presidentin e saj të ri në janar, Donald Trump, i cili u zgjodh në këtë post në nëntor.
Që nga fillimi i luftës në Ukrainë, SHBA-ja ka dhënë 175 miliardë dollarë ndihmë për atë vend, duke përfshirë rreth 61.4 miliardë dollarë për sigurinë.
Gjysma e kësaj ndihme është siguruar përmes programit të USAI-t, ndërsa pjesa tjetër është siguruar përmes furnizimeve ekzistuese ushtarake. Gjithashtu, 5.6 miliardë dollarë kanë mbetur nga rezerva presidenciale./abcnews.al
