Rusia dhe Irani duan dialog mes qeverisë dhe “opozitës legjitime” në Siri

Ministri i Jashtëm rus Sergei Lavrov  tha se ai dhe homologët e tij turq Hakan Fidan dhe iranian Abbas Araghsi ranë dakord, në takimin e tyre në Doha, që “armiqësitë” në Siri duhet të përfundojnë menjëherë.

Lavrov deklaroi se Moska dëshironte dialog midis qeverisë siriane dhe “opozitës legjitime”, siç e quajti ai.

Pak më parë, ministri i Jashtëm i Iranit, Abbas Araghsi, u tha gjithashtu gazetarëve se “duhet të fillojë një dialog politik midis qeverisë siriane dhe përfaqësuesve legjitimë të opozitës”.

Lavrov i quajti rebelët e grupit islamik Hayat Tahrir al-Sham “terroristë” , megjithëse ata vetë thonë se kanë ndryshuar pikëpamjet e tyre. Është “e papranueshme të lejohen grupet terroriste” të kontrollojnë territoret siriane, shtoi ai.

I pyetur se si pret të zhvillohet situata në Siri dhe çfarë do të ndodhë me bazat ruse në atë vend, Lavrov u përgjigj se “nuk mund të spekulojë”.

Duke komentuar në përgjithësi situatën në Lindjen e Mesme, Lavrov tha gjithashtu se ekstremizmi do të riprodhohet në rajon nëse nuk krijohet një shtet palestinez./abcnews.al