Mbretëria e Bashkuar ka vendosur sanksione ndaj 10 individëve dhe subjekteve që qëndrojnë pas “deportimit të dhunshëm të Rusisë dhe tentativës për indoktrinim të fëmijëve ukrainas”.
Sekretari i Jashtëm britanik, David Lammy tha se sanksionet kanë për qëllim ata që mbështesin këtë “program tinëzar”.
“Asnjë fëmijë nuk duhet të përdoret kurrë si peng në luftë, megjithatë shënjestrimi i fëmijëve ukrainas nga Presidenti Putin tregon thellësitë në të cilat ai do të shkojë në misionin e tij për të fshirë Ukrainën dhe njerëzit e saj nga harta,” tha Lammy.
Masat janë pjesë e përpjekjeve të vazhdueshme të Britanisë dhe aleatëve të saj perëndimorë për të dobësuar ekonominë ruse dhe financimin e luftës. Mbretëria e Bashkuar vlerëson se rreth 20,000 fëmijë ukrainas janë deportuar në Rusi ose në territoret e pushtuara nga Rusia me qëllim të humbjes së identitetit të tyre ukrainas dhe promovimit të ndjenjave pro-ruse./abcnews.al
