Ndërkohë që Alvaro Morata është i përqendruar tek Euro 2024 me Spanjën, që të premten do të sfidojë vendasit e Gjermanisë për një biletë në gjysmëfinale, familja e tij ka rënë pre e një grabitjeje, me gruan e “veteranit” të sulmit, Alice Campello, e cila ka bërë të ditur lajmin e hidhur me anë të një postimi në profilin e saj, në rrjetet sociale.
“Dje na vodhën gjithçka që kishim marrë me vete në pushime. Preferoj ta them vetë e para këtë që ndodhi përpara se të merret vesh nga të gjithë. Ju siguroj që të gjithë jemi mirë. Tani jemi të rrethuar me njerëz që janë 24 orë me ne, jemi më të qetë”,- shkruan modelja dhe sipërmarrësja italiane, që ndodhej me pushime në vendlindje bashkë me 4 fëmijët.
Ndërkaq, kujtojmë se kjo nuk është hera e parë që grabitet shtëpia e familjes Morata, pasi diçka e tillë ka ndodhur edhe më parë edhe në vitin 2019 në “Mirasierra”, një lagje e Madridit. /i.m /abcnews.al
