Drejtori i Agjencisë Qendrore të Inteligjencës Amerikane (CIA) William Burns ka paralajmëruar se ekziston një “rrezik real” që ukrainasit mund ta humbin luftën ndaj Rusisë në fushën e betejës deri në fund të vitit 2024.
Për ata që u mblodhën në Qendrën Presidenciale Xhorxh W. Bush në Dallas, Burns tha se Ukrainës “po i mbaronte municioni” dhe se Perëndimit “po i mbaronte koha për të ndihmuar” Kievin.
Burns kritikoi ligjvënësit amerikanë për vonimin e dërgimit të ndihmës shtesë në Ukrainë.
“Me ndihmë shtesë nga Kongresi i SHBA-së, mendoj se ukrainasit mund të qëndrojnë në fushën e betejës në vitin 2024 dhe të vazhdojnë të bëjnë dëme” në Krime dhe kundër Flotës së Detit të Zi, tha drejtori i CIA-s.
Ai shtoi se pa atë ndihmë, “fotografia është shumë më e frikshme”.
Rusia ka shtuar sulmet ajrore me rreze të gjatë kundër sistemit energjetik të Ukrainës dhe objektivave të tjera javët e fundit, duke rritur presionin mbi Kievin shumë prapa vijave të frontit ku forcat ruse po përparojnë ngadalë në lindje./abcnews.al
