Eriola Ibro ka një histori tepër prekëse, të cilën ajo ka vendosur ta ndajë me të gjithë publikun në emisionin “ABC e Mëngjesit”.
Në një lidhje me Skype nga Italia, ajo ka treguar se ka dy fëmijë, që vuajnë nga dy sëmundje shumë të rralla në gjak, për të cilat mjekët nuk kanë ende një medikamet kurimi, por prindërit i duhet të firmosin për çdo mjekim eksperimental.
Shumë e emocionuar, Eriola ka zbuluar në fillim ajo kërkonte gjak për fëmijët e saj, por tashmë është kthyer në një dhuruese të rregulltë.
“Unë kam dy fëmijë që janë me sëmundje gjaku, autoimune, nuk janë të trashëgueshme, që do të thotë gjaku im nuk ndikohet nga problemi i tyre, por e di çdo të thotë të rrish dyerve të spitaleve, e di çdo të thotë të rrish të presësh për një shpresë, për diçka që bëjnë të tjerët për të shpëtuar jetën tënde. Kështu që unë nisa të dhurojë gjak, dhurimi nuk i kushton asgjë askujt. Unë dhuroj çdo katër muaj rregullisht. Kur po e bëj unë që kam dy fëmijë që më shumë rrinë në spital se në shtëpi, çfarë i mungon të tjerëve që janë në gjendje të mirë shëndetësore?
Fëmijët e mi nuk marrin gjak, kanë nevojë për trajtime të tjera, pasi kanë dy sëmundje shumë të rralla, më të rrallat në Europë. Janë trajtuar për disa vite në Gjermani, ndërsa aktualisht po trajtohen në Itali. Ata janë 9 dhe 6 vjet. Fatkeqësisht, nga që janë shumë të rralla dhe nga që nuk ka pasur sëmundje të tjera në Europë me sëmundje të tilla, nuk kam shumë të dhëna se si do vazhdojë jeta e këtyre fëmijëve, deri kur do shkoj jeta e këtyre fëmijëve, si do procedohet, ne gjithçka i kemi eksperimentale dhe ne prindërit mbajmë përgjegjësi për mjekimet, pasi firmosim gjithmonë kur ata i marrin mjekimet”, tha Eriola./abcnews.al
