Loading ...Ish kandidati për kryetar të Partisë Demokratike, Ibsen Elezi thotë se kryetari i Partisë Demokratike zyrtare, Lulzim Basha do duhet të ishte i pranishëm në mbledhjen që u zhvillua të enjten, të grupit të dialogut për reformat.
Në një intervistë për “Tirana Live” në ABC News, Elezi u shpreh se opozita duhet të ulet bashkë sa i takon reformës zgjedhore.
“Çështjet zgjedhore janë çështje e rëndësishme politike. Po i referohem çështjeve zgjedhore. Gjithë opinioni publik është bindur që listat duhet të jenë të hapura. Sherrnajat e opozitës janë sherrnaja që në thelbin e tyre nuk kanë një përmbajtje. Po zihen dhe po krijojnë situata për çështje përfaqësimi. Pra, janë disa çështje thelbësore që këta mund të bien dakord. Opozita duhet të jetë serioze për atë që i kërkon Kushtetuta. Rama mund t’i realizojë këto dhe mund të bëjë si të dojë, por nëse do të veprojë në mënyrë të njëanshme, do të ishte e papranueshme për opinionin publik dhe për ndërkombëtarët. Deri në këto momente, grupi i Bashës ka një avantazh ndaj Rithemelimit. Zoti Basha, duhet të jetë prezent dhe duhet të debatohen. Kur debaton në tavolinë marrin rëndësi më të plotë.
Do të ballafaqohen ide, kjo është shumë e rëndësishme, ballafaqimi i drejtpërdrejtë. E njëjta sjellje si e Rithemelimit pak javë më parë, të njëjtin gabim po bën edhe zoti Basha. Këta kanë qindra akuza ndaj njërit-tjetrit, por kur flitet për një sistem zgjedhor, duhet të uleshin bashkë. Është minimumi që mund të bëjnë. Duhet të vendosin piketat mbi disa rregulla kryesorë”, theksoi ai./abcnews.al
