Granit Xhaka dhe tifozët e Arsenalit nuk kanë një marrëdhënie të mirë me njëri-tjetrin. Mesfushori me origjinë shqiptare po luan sezonin e tij të tretë në “Emirates”, por asnjëherë nuk e ka fituar dashurinë e tifozëve londinezë. Këtë sezon, gjithçka është krisur. Kjo pasi trajneri Unai Emery, vendosi ta zgjedhë si kapiten të skuadrës.
Kjo gjë nuk i ka pëlqyer aspak tifozëve të Arsenalit, që i janë vënë kundër mesfushorit. Siç e ka pranuar dhe Xhaka vetë disa kohë më parë, ai ka marrë kërcënime, ofendime dhe shumë sulme verbale ndaj tij personalisht dhe familjes së tij. Xhaka është detyruar të mbyllë edhe komentet dhe përgjigjet në rrjetet e tij sociale, pasi mesazhet kundër tij kanë qenë të shumta.
Para disa javësh, Xhaka dhe partnerja e tij u shtuan me fëmijë, gjë që bëri që Xhaka të marrë dy javë pushime. Edhe për këtë vendim të kapitenit të Arsenalit, tifozët i dolën kundër, duke i shkruar mesazhe nga më të ndryshmet. Gjithçka ka nisur pas asaj finale të humbur të Europa League në fundin e sezonit të shkuar, por këtë sezon, gjithçka ka plasur./abcnews.al
