Kryeministri izraelit, Benjamin Netanyahu ka këmbëngulur se trupat ushtarake do të avancojnë në qytetin Rafah të Gazës, duke sfiduar paralajmërimet ndërkombëtare. Presidenti francez Emmanuel Macron ishte mes atyre që paralajmëruan Netanyahun, duke i thënë se kostoja njerëzore e operacionit të Izraelit në Gaza ishte “e patolerueshme”.
Rreth 1.4 milionë palestinezë janë strehuar në Rafah, i cili tashmë është nën bombardime. Netanyahu u zotua të vazhdojë me një sulm “të fuqishëm”, duke deklaruar se Hamasi, grupi që kontrollon Gazën, duhet të eliminohet nga qyteti jugor.
“Ne do të luftojmë deri në fitoren e plotë dhe kjo përfshin një aksion të fuqishëm edhe në Rafah pasi të lejojmë popullsinë civile të largohet nga zonat e betejës,” tha ai.
Presidenti Macron telefonoi Netanyahun të mërkurën, duke i kërkuar që të ndalojë operacionet në Gaza. Ai shprehu “kundërshtimin e vendosur të Francës ndaj një ofensive izraelite në Rafah, e cila mund të çojë vetëm në një fatkeqësi humanitare të një përmasash të reja”.
Kryeministrat e Australisë, Kanadasë dhe Zelandës së Re lëshuan një deklaratë të përbashkët duke shprehur shqetësimin e tyre të madh se një operacion ushtarak në Rafah do të ishte “katastrofik”.
“Ne i bëjmë thirrje qeverisë izraelite që të mos ndjekë këtë rrugë”, thuhet në deklaratë, duke shtuar se “ndikimet mbi civilët palestinezë nga një operacion i zgjeruar ushtarak do të ishin shkatërruese”.
Ministrja e Jashtme gjermane Annalena Baerbock, duke vizituar Izraelin, paralajmëroi se njerëzit në Rafah që nuk kanë ku të shkojnë nuk mund “thjesht të zhduken në ajër”.
Spanja dhe Republika e Irlandës i kanë kërkuar BE-së, anëtarë të së cilës janë, të shqyrtojë “urgjentisht” nëse Izraeli është në përputhje me detyrimet e tij për të drejtat e njeriut në Gaza.
Ministria e shëndetësisë në territorin palestinez të drejtuar nga Hamasi raporton se të paktën 28,576 njerëz, kryesisht gra dhe fëmijë, janë vrarë si rezultat i ofensivës së Izraelit në Gaza.
Izraeli ndërmori veprime pasi persona të armatosur të udhëhequr nga Hamas vranë të paktën 1200 njerëz dhe kapën 253 pengje në një sulm të befasishëm në territorin e tij më 7 tetor.
