Gjykata e Posaçme i kërkoi prokurorisë të plotësojë hetimet për dosjen ndaj ish-kryetarit të bashkisë së Durrësit Vangjush Dako, I arrestuar për shpërdorim detyre.
Gjykata I dha 25 ditë kohë SPAK të plotësojë dosjen në ngarkim të ish kryebashkiakut pasi konstatoi se nuk ka një akt ekspertimi për tenderin e zhvillimit të vijës bregdetare. Seanca paraprake u shty për në datë 27 shkurt ku deri më këtë datë duhet të jetë kryer ekspertimi për të përcaktuar vlerën për projektin e vijës bregdetare.
SPAK pretendon se Dako në bashkëpunim me zyrtarë të tjerë kanë shpërdoruar detyrën duke përllogaritur gabim fondin limit dhe duke mos e rregulluar më pas këtë gabim, të evidentuar nga një audit i kontrollit të lartë të shtetit.
Për Gjykatën, hetimi është i paplotë pa përcaktuar gendjen aktuale të inevstimit dhe dëmin në buxhet.
Seancën e kaluar Dako kërkoi që projekti të verifikohet në terren ndërsa për akuzën tjetër të shpërdorimit të detyrës për lejen e ndërtimit të një pallati në vitin 2011, ish-kryebashkiaku tha se ka qenë një vendim kolegjial. Vangjush Dako mbahet i paraburgosur prej qershorit të kaluar, ndërsa të gjitha shkallët e gjykimit kanë rrefuzuar kërkesat e tij për lirimin nga qelia./abcnews.al
