Raketat nga Koreja e Veriut që i janë dorëzuar Rusisë janë përdorur në sulmet në shkallë të gjerë kundër Ukrainës gjatë ditëve të fundit, tha Shtëpia e Bardhë të enjten, duke denoncuar “përshkallëzimin e vazhdueshëm dhe shqetësues” të mbështetjes së Phenianit për Moskën.
“Informacionet tona tregojnë se Koreja e Veriut i ka dorëzuar Rusisë sisteme të lëshimit të raketave balistike dhe disa raketa balistike,” disa prej të cilave u përdorën më 30 dhjetor dhe 2 janar në sulmet kundër Ukrainës, tha zëdhënësi i Këshillit të Sigurisë Kombëtare të Shtëpisë së Bardhë, John Kirby.
Komentet e Kirby erdhën pasi udhëheqësi i Koresë së Veriut Kim Jong Un bëri thirrje për rritjen e prodhimit të raketave gjatë një vizite në një fabrikë të pajisjeve ushtarake në përgatitje për “një konfrontim ushtarak” me Korenë e Jugut dhe SHBA-në, njoftoi sot agjencia shtetërore e lajmeve KCNA.
Mbrojtja ajrore e Ukrainës, e cila është përballur me një breshëri bombardimesh nga Rusia ditët e fundit, mbetet një prioritet “absolut”, theksoi Kirby. Më pas, më 2 janar, Rusia lëshoi disa raketa në Ukrainë në një sulm ajror masiv, shtoi Kirby.
SHBA dhe aleatët e saj tani planifikojnë të çojnë çështjen në Këshillin e Sigurimit, pasi dorëzimi i këtyre raketave është një shkelje e sanksioneve që organizata ka vendosur ndaj Koresë së Veriut, tha ai.
Në tetor, SHBA njoftoi se më shumë se 1000 kontejnerë që përmbanin pajisje ushtarake dhe municione i ishin dorëzuar Rusisë nga Koreja e Veriut javët e fundit.
/abcnews.al
