Kryeministri britanik Rishi Sunak siguroi këtë të martë presidentin ukrainas Volodymyr Zelensky për mbështetjen e palëkundur të Mbretërisë së Bashkuar në vitin 2024 dhe më tej nëse është e nevojshme.
Gjatë bisedës telefonike mes dy liderëve, Rishi Sunak “nënvizoi përpjekjet që Britania e Madhe po bën për të ofruar mbështetje ushtarake dhe diplomatike për Ukrainën“, duke përfshirë dërgesat e mëtejshme të sistemeve të armëve, thuhet në deklaratën e Downing Street.
Ai gjithashtu shprehu ngushëllimet e tij për familjet e viktimave dhe të plagosurve nga sulmet e rënda ajrore të Rusisë gjatë sezonit të festave të Krishtlindjeve.
Rusia nisi një breshëri të re sulmesh në Ukrainë këtë mëngjes, duke vrarë të paktën pesë persona dhe duke plagosur 119, kryesisht në Kiev dhe Kharkiv, thanë autoritetet ukrainase. Ai u parapri nga kërcënimi i presidentit rus Vladimir Putin për të rritur bombardimet në Ukrainë si hakmarrje për sulmin në Belgorod, i cili vrau 25 persona.
Sipas njoftimit nga Downing Street, të dy udhëheqësit diskutuan gjithashtu “zhvillimet e fundit në konflikt, veçanërisht përparimin e bërë në Detin e Zi dhe sukseset e mbrojtjes ajrore të Ukrainës, të cilat janë përforcuar nga raketat tokë-ajër nga Mbretëria e Bashkuar” .
Londra njoftoi të premten dërgimin e rreth 200 raketave kundërajrore në Ukrainë për të forcuar mbrojtjen e saj, duke u bërë thirrje aleatëve të “dyfishojnë përpjekjet e tyre” për të mbështetur ushtarakisht Kievin.
Që nga fillimi i vitit të kaluar, Mbretëria e Bashkuar ka dërguar tanke Challenger 2, tre armë vetëlëvizëse AS-90, qindra automjete të blinduara, raketa me rreze të gjatë veprimi Storm Shadow dhe drone. Vlera e ndihmës ushtarake britanike për Ukrainën vlerësohet në 5.3 miliardë euro./abcnews.al
