Vijojnë kontrollet në kuadër të megaoperacionit “Tempulli”. Së fundmi, një 32-vjeçar ka rënë në prangat e policisë, pasi është kapur me kanabis në makinë.
Sakaq, pasagjerja që e shoqëronte, 16-vjeçe po procedohet penalisht.
Ndërkohë, policia u ka sekuestruar dhe 450 euro dhe 40 000 lekë që dyshohet se janë përfituar nga shitja e lëndës narkotike.
Njoftimi i policisë:
Tropojë/Vijojnë kontrollet dhe hetimet, në kuadër të megaoperacionit “Tempulli”, për goditjen e rasteve të prodhimit dhe shitjes së lëndëve narkotike.
Posedonte në automjet, lëndë narkotike cannabis sativa, me qëllim përdorimin dhe shitjen, arrestohet 32-vjeçari.
Procedohet në gjendje të lirë një 16-vjeçare, pasagjere në automjet.
Sekuestrohen një sasi lënde narkotike cannabis sativa dhe shuma parash, në euro dhe në lekë, që dyshohet se janë përfituar nga veprimtaritë kriminale.
Si rezultat i kontrolleve intensive në të gjithë territorin e qarkut, si dhe i hetimeve të ndjekura proaktivisht, në kuadër të megaoperacionit “Tempulli”, shërbimet e Komisariatit të Policisë Tropojë, në bashkëpunim me ato të DVP Kukës, kanë konstatuar dhe goditur një tjetër rast të veprimtarive kriminale në fushën e narkotikëve.
Në Bajram Curri, është ndaluar për kontrolle, automjeti me drejtues shtetasin dhe ku ishte pasagjere një 16-vjeçare. Gjatë kontrolleve, u gjetën dhe u sekuestruan në cilësinë e provës materiale, një sasi lënde e dyshuar narkotike cannabis sativa, 450 euro dhe 40 000 lekë që dyshohet se janë përfituar nga shitja e lëndës narkotike.
Në përfundim të veprimeve procedurale për rastin, u arrestua shtetasi, 32 vjeç dhe nisi procedimi në gjendje të lirë për 16-vjeçaren, të dy banues në Durrës.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme./abcnews.al
