Crvena Zvezda nuk do të lejohet të hyjë në Kosovë, edhe pse shorti i Kupës së Serbisë i ka rezervuar si kundërshtar ekipin e Trepçës, që garon në ligën e tretë në futbollin serb. FFK iu drejtua pak kohë më parë FIFA-s që të ndërhynte për këtë gjë, por përgjigja ishte negative dhe organi i qeverisë së futbollit botëror kërkoi që dardanët të tërhiqeshin.
Në Serbi tashmë raportojnë se forca policore janë angazhuar në pikën kufitare në Jarinë për të mos lejuar ekipin e Crvena Zvezda të hyjë në Kosovë dhe të luajë ndeshjen e kthimit të Kupës në Mitrovicë.
Nga ana e klubit të Trepçës është konfirmuar se ndeshja nuk do të zhvillohet, ndërkohë që akoma ekipi serb nuk ka mbërritur në kufi. Mbetet për t’u parë se çfarë do të ndodhë në orët në vazhdim. Telegraf.rs ka publikuar edhe foto nga pika kufitare, ku shikohen forcat e rendit që janë në pritje të ekipit serb. /abcnews.al
