Rënia e aktivitetit të bizneseve në eurozonë u thellua më tepër se ç’pritej në korrik, ndikuar veçanërisht nga rënia e industrisë së shërbimeve si dhe e prodhimit të fabrikave.
Indeksi i përpiluar nga Standard and Poors për menaxhimin e blerjeve, një matës i shëndetit të përgjithshëm ekonomik për vendet e bllokut ra në 48.9% në korrik, nga 49.9% që ishte në qershor, niveli më i ulët në 8 muaj.
“Prodhimi vazhdon të jetë thembra e Akilit në eurozonë. Prodhuesit kanë ulur sërish prodhimin e tyre me një ritëm të përshpejtuar në korrik, ndërkohë që aktiviteti i sektorit të shërbimeve po zgjerohet ende, megjithëse me një ritëm shumë më të ngadaltë se në fillim të vitit,” thanë përfaqësues të bankës tregtare të Hamburgut, ndërsa shtojnë se ekonomia e bllokut pritet të tkurret më tej në vijim.
Konsumatorët nga ana tjetër po përballen me rritje të kostove të mallrave e shërbimeve, duke vënë në rrezik edhe aftësinë e tyre paguese të huamarrjes për shkak të rritjes së normës së interesit.
Me gjithë politikën shtrënguese agresive të ndërmarrë nga Banka Qendrore Europiane, sërish kjo e fundit nuk ia ka dalë të rikthejë inflacionin në objektivin e saj prej 2%. Ajo pritet të rrisë sërish normën bazë të interesit të enjten për të lehtësuar presionin e çmimeve në eurozonë./abcnews.al
