Një numër i madh protestuesish irakianë hynë ne oborrin e Ambasadës së Suedisë në Bagdad sot për të shprehur zemërimin e tyre për lejimin e një ekstremisti të djegë një kopje të Kuranit të shenjtë në Stokholm.
Sipas të përditshmes lokale “Baghdad Today”, protestuesit arritën të hapin portën e ambasadës dhe të hyjnë në kompleks.
Protestuesve iu tha të largoheshin nga ambasada menjëherë pasi hynë brenda, shtoi e përditshmja.
Kanali shtetëror i radios suedeze në gjuhën arabe raportoi se i gjithë personeli i ambasadës është i sigurt.
Agjencia zyrtare irakiane e lajmeve INA raportoi se protestuesit ngritën kopje të Kuranit “për të konfirmuar krenarinë e myslimanëve me Kuranin e shenjtë dhe për të hedhur poshtë aktin e turpshëm që ndodhi në kryeqytetin suedez pasi qeveria lejoi një demonstratë” për të djegur një kopje të Kuranit.
Agjencia e lajmeve shtoi se protestuesit u organizuan në përgjigje të thirrjes së klerikut të fuqishëm shiit Muqtada al-Sadr.
Të mërkurën, një person i identifikuar si Salwan Momika dogji një kopje të librit të shenjtë mysliman nën mbrojtjen e policisë përpara xhamisë së Stokholmit.
Akti provokues i ekstremistit përkoi me Kurban Bajramin.
Krimi i djegies së kopjes së Kuranit shkaktoi zemërim të gjerë dhe reagime në botën islame, duke përfshirë Turqinë, Jordaninë, Palestinën, Arabinë Saudite, Marokun, Irakun, Iranin, Pakistanin, Senegalin dhe Mauritaninë.