Në celje të fushatës elektorale, kreu I PL Ilir Meta u shpreh nga stadium Air Albania, se më 14 maj është koha e revolucionit me votë, i cili sipas tij do të sjellë transparencë dhe llogaridhënie absolute.
“Është koha të vrapojmë. Edhe 29 ditë për t’i dhënë fund monizmit absolut në pushtetin vendor. Shpesh pyes veten, më në fund pas 4 vitesh do të shkallmojmë pikërisht atë që askush nuk e mendonte dhe imagjinonte ndonjëherë në Shqipëri.
Që ky vend anëtar i NATO-s, që ky vend 100% pro europian të jetë një vend ku në mënyrë të paligjshme, një klikë kontrollon në mënyrë absolute të gjithë pushtetin vendor, jo vetëm me kryebashkiakët, por edhe me të gjithë këshilltarët. Asnjë këshilltar opozitar në 4 vjet në Shqipëri. Dhe ne e dimë shumë mirë se pushtet absolut do të thotë korrupsion absolut ashtu siç është e gjithë Rilindja në pushtetin vendor dhe jo vetëm. Ndaj nuk është koha për ndryshim, sepse koha e ndryshimit ka kaluar me kohë.
Është koha për revolucion. Po çfarë revolucioni? Për revolucionin me votë. Po çdo të sjellë ky revolucion me votë?Do të sjellë përmbysje, do të sjellë përmbysjen e korrupsionit absolut dhe do të sjellë njëherë e përgjithmonë transparencë absolute, llogaridhënie absolute, për çdo kryebashkiak që do të zgjidhet dhe për këshillat bashkiake që do të mbrojnë interesin e qytetarëve.
Ai autobuz atje është një shpresë e madhe jo thjesht për transportin falas çdo ditë për 200 mijë qytetarët e Tiranës, por ai autobuz është një shpresë e madhe se më në fund nuk do të vendosen taksa arbitrare për shërbime që kurrë nuk shkojnë tek qytetarët, por që shkojnë tek pronarët në kërkim ndërkombëtar të inceneratorëve që nuk ekzistojnë. Se më në fund do të ketë kryebashkiak që do të mendojnë e do të zgjidhin problemet më jetike të qytetarëve të Tiranës, të Durrësit, të Elbasanit, të Shkodrës e të gjithë Shqipërisë./abcnews.al
