Mësuesit në Angli kanë refuzuar me shumicë dërrmuese ofertën e qeverisë britanike për një rritje pagash që synon t’i japë fund një sërë grevash.
Sindikata Kombëtare e Arsimit (NEU), sindikata më e madhe e arsimit në Britani, njoftoi se 98% e mësuesve që votuan për të refuzuar propozimin e qeverisë ndoqën rekomandimin e sindikatës për të mos pranuar ofertën e një pageseprej 1,137 € këtë vit dhe rritjen e pagave të tyre prej 4.5% për vitin e ardhshëm financiar.
Dhjetëra mijëra mësues në të gjithë Britaninë janë në grevë për rritje të pagave për shkak të rritjes së inflacionit, duke i lënë klasat bosh dhe duke ushtruar presion ndaj kryeministrit Rishi Sunak për të ndihmuar në zgjidhjen e mosmarrëveshjes.
Sindikata njoftoi se mësuesit do të mbajnë sërish grevë më 27 prill dhe 2 maj. Qeveria argumenton se rritjet më të mëdha të pagave vetëm sa do të përkeqësojnë inflacionin.
Mësuesit në Uells i kanë dhënë fund grevave pasi votuan për të pranuar një ofertë prej një shtesë prej 3% për 2022/23 së bashku me një shumë të përgjithshme prej 1.5% dhe një rritje prej 5% të financuar nga qeveria për vitin e ardhshëm.
Sindikata më e madhe e mësuesve të Skocisë ka pranuar gjithashtu një marrëveshje pagash që synon t’i japë fund grevave, e cila thotë se do të barazohet me një rritje pagash prej 14.6% për shumicën e mësuesve deri në vitin 2024.
/abcnews.al
