Nëse ju po kaloni momente të stresuara ose keni më shumë përgjegjësi nga sa ju mund t’ia dilni, e gjithë kjo lodhja juaj emocionale ndikon tek ju më së shumti gjatë gjumit.
Tetë orët magjike të gjumit janë një mision i pamundur për shumëkënd dhe aty fillojnë problemet e mundshme.
Mungesa e gjumit prek të gjitha sferat e jetës dhe nuk duhen anashkaluar simptomat që tregojnë se nuk jeni duke fjetur mjaftueshëm.
Mungesa e humorit të mirë
Gjumi dhe shëndeti emocional janë të lidhura thellësisht. Sipas statistikave të Shkollës Mjekësore të Harvardit, pacientët me ankth dhe depresion kanë më shumë gjasa të raportojnë pagjumësi kronike.
Edhe humbja afatshkurtër dhe e pjesshme e gjumit mund të ndikojë negativisht në humor.
“Nëse jeni të privuar nga gjumi, jeni më të ndjeshëm ndaj nervozizmit dhe aftësisë për të përballuar stresin”, thotë Dr. Lauren Hale, një profesore në programin e shëndetit publik në Universitetin Stonybrook.
Rënie e produktivitetit
Privimi kronik i gjumit mund të ndikojë negativisht në aftësinë tonë për të arsyetuar, për t’u fokusuar dhe madje për të gjetur fjalët e duhura për të përshkruar gjëra të thjeshta. Shpesh besojmë se është absolutisht e nevojshme të rrimë zgjuar deri vonë duke përfunduar punën ose studimin, por rezulton se ndalimi i punës në kohë për të bërë një gjumë të mirë gjatë natës është përgjithësisht mënyra më e mirë për të përmirësuar produktivitetin dhe performancën e përgjithshme.
Pesha juaj
Një studim i madh i grupit të gjumit në Wisconsin zbuloi se njerëzit që flinin më pak se gjashtë orë çdo natë kishin më shumë gjasa të ishin obezë. Ky grup tregon ulje të niveleve të hormonit leptin që ndalon oreksin, së bashku me nivele të rritura të hormonit grelin që stimulon urinë. Kur jemi tepër të lodhur, ne priremi të kërkojmë më shumë ushqime.
Gjendje e keqe e lëkurës
Sytë e kuq, të fryrë, rrathët e zinj janë një nga treguesit se nuk po flini sa duhet. Edhe sasi të vogla të mungesës së gjumit mund të ndikojnë në pamjen tuaj.
Jeni të përgjumur gjatë ditës
Kjo është një nga shenjat e mungesës së gjumit që është mjaft e dukshme. Të ndihesh i rraskapitur gjatë ditës tregon që ju nuk po flini mjaftueshëm. /abcnews.al
