Përcillet për në banesën e fundit aktorja korçare Valentina Caci. Bashkëpunëtorët e saj e kujtojnë si një aktore që spikati për talentin e rrallë dhe u duartrokit nga shumë breza.
Aktorja korçare,Valentina Caci, u përcoll për në banesën e fundit. Familjarë, kolegë, miq dhe qytetarë, bënë homazhe në ambientet e teatrit “Çajupi”, ku aktorja e skenës dhe kinematografisë interpretoi dhjetëra role duke spikatur me talentin e saj të rrallë.
Bashkëpunërorët e saj vlerësuan kontributin e Valentina Cacit, cila mbante edhe titullin “Artiste e Merituar”.
Valentina Caci lindi në qytetin e Korçës më 2 Mars të vitit 1936. Me rolet dhe personazhet karakteristike, të luajtura me mjeshtëri, në skenë, dhe veçanërisht në film, Valentina Caci fitoi simpatinë dhe u duartrokit nga shumë breza, duke na lënë pas një trashëgimi të vyer në teatër e kinematografi.
Aktorja Caci ka një galeri të pasur rolesh në teatër dhe kinema, ndërsa për publikun e gjerë njihet për rolet në filmat: “Zonja nga qyteti”, “Vëllezër dhe shokë”, “Kur çel dashuria”, “Me hapin e shokëve”./ABC News Albania 24/7
