Presidenti amerikan Joe Biden ka rezultuar pozitiv për koronavirusin. Siç raporton agjencia e lajmeve Reuters, kreu 79-vjeçar i Shtëpisë së Bardhë ka simptoma të lehta. Lajmin e bëri të ditur Shtëpia e Bardhë të enjten.
Po ashtu, bëhet e ditur se Biden do të vijojë me detyrat e tij nga zyra ndërsa ka filluar që të marrë një terapi me antiviralë Paxlovid. Qytetarët amerikanë do të informohen rreth shëndetit të kreut të tyre të shtetit me anë të një përditësimi ditor.
Ndërkohë kujtojmë se Biden udhëtoi së fundmi për në Somerset, Massachusetts, të mërkurën ku njoftoi veprime ekzekutive për të adresuar ndryshimet klimatike. Presidenti përshëndeti po ashtu të martën zonjën e parë ukrainase Olena Zelenska në Shtëpinë e Bardhë.
“Ai ka qenë në kontakt me anëtarët e stafit të Shtëpisë së Bardhë me telefon këtë mëngjes dhe do të marrë pjesë në takimet e tij të planifikuara në Shtëpinë e Bardhë këtë mëngjes përmes telefonit dhe Zoom nga rezidenca”, njoftoi më tej Shtëpia e Bardhë. /abcnews.al/
