Në puntatën e radhës në emisionin Pressing u fol për kampionatin shqiptar të futbollit dhe zhvillime të tjera sportive, ku në panelin e të ftuarve ishin: drejtori sportiv i Partizanit Olsi Rama, Gea Braha moderatore dhe tifoze e Tiranës, Eno Skarço gazetar dhe Gentian Cici, arbitën ndërkombëtar basketbolli.
Gjatë emisionit sportiv “Pressing”, drejtori i përgjithshëm i Partizanit, Olsi Rama, foli rreth një prej lojtarëve më të mirë të skuadrës, Jasir Asanin. Ai tha se Asani ka një kontratë me “të kuqtë” dhe kushdo që kërkon shërbimet e lojtarit duhet të flasë së pari me Partizanin. Në këtë mënyrë ai i ktheu përgjigje spekulimeve për një largim të mundshëm të lojtarit.
Olsi Rama theksoi se nuk kemi të bëjmë me një rast të njëjtë si ai me Kaleb Ekuban. Kjo pasi ish-lojtari i Partizanit ishte në pronësi të Chiveo-s, ndërsa shqiptaro-maqedonasi është 100% në pronësi të kryeqytetasve.
“E kam thënë që mos besoni ato që lexoni në gazeta. Ky ishte një lajm që e lexova. E ceka pak dhe e thashë. Objektivi jonë si Partizan është që këta lojtarë që i marrim t’i rrisim profesionalisht dhe si njerëz dhe më pas t’i krijojmë mundësinë që të transferohen jashtë në kampionate më të mira. Nga kjo përfitojmë jo vetëm ne financiarisht. Asani është nën kontratë. Kushdo që do të ikë dhe kushdo që kërkon Asanin duhet të flasë me Partizanin. Nuk ka asnjë lloj rasti me Ekubanin. Asani është 100% lojtar i Partizanit. Asani ka treguar një rritje shumë të mirë këtë vit dhe që ka një interes shumë të madh mbi të”, tha Olsi Rama./abcnews.al
