“Abissnet Superiore” zhvilloi ditën e djeshme edhe ndeshjet e fundit të sezonit, ndërsa tashmë pritet largime dhe afrime nga skuadrat, të cilat do të bëhen gati për kompeticionet europiane apo për sezonin e ri.
Nga Teuta është larguar një tjetër lojtarë pas Sebino Plakut. Bëhet fjalë për Blagoja Todorovski, i cili tashmë zyrtarisht nuk do të jetë më pjesë e durrsakëve.
36-vjeçari largohet nga djemtë e detit pas 3 sezonesh, teksa me ta ka fituar 4 trofe, pasi ngriti lart dy herë trofeun e Superkupës, një herë Kupë dhe një titull kampion.
Lajmin e ka bërë të ditur vetë lojtari nëpërmjet një postimi në rrjetet sociale, duke falënderuar edhe Teutën për mundësinë e dhënë.
“Një falenderim i madh për Teutën, presidentin dhe cilindo që ka qenë pjesë e imja për tre vite që kam luajtur këtu. Dua ta mbyll sezonin me këto fjalë, ndaj i uroj të gjithëve fat për të ardhmen”, shkruan Todorovski. /f.a/abcnews.al
