Të mbijetuarit po dalin nga rrënojat e teatrit të bombarduar nga Rusia në qytetin ukrainas të Mariupol. Pavarësisht se siç u pa nga pamjet, godina u shkatërrua, shumë civilë që ishin strehuar atje mendohet se kanë mbijetuar në një bodrum që i rezistoi sulmit të së mërkurës, raporton BBC.
Për 10 ditë, ai bodrum ishte një strehë për Kate, një 38-vjeçare nga Mariupoli, dhe djalin e saj 17-vjeçar. Shtëpia e tyre, si shumë të tjera në qytetin e rrethuar, ishte shkatërruar nga sulmet ruse dhe ata mendonin se Teatri Rajonal i Dramës në Donetsk ishte një vend ku ata do të ishin relativisht të sigurt, përcjell abcnews.al.
Nënë e bir u strehuan në dhomat e errëta të godinës, korridoret dhe sallat me dhjetëra familje të tjera. Disa gra, tha Kate, kishin foshnja që ishin vetëm katër ose pesë muajshe.
Kate, e cila dikur punonte në dyqanin e kopshtit zoologjik të qytetit dhe nuk donte të jepte emrin e saj të plotë, tha: “Në fillim ishte vërtet e vështirë, sepse nuk kishim një furnizim të mirëorganizuar ushqimor. “Pra, në dy ditët e para, të rriturit nuk kishin ushqim. Ne ua jepnim vetëm fëmijëve.”
Për gati tre javë, Mariupol ka qenë nën granatimet e vazhdueshme nga forcat ruse, të cilat kanë rrethuar plotësisht qytetin. Rreth 300,000 njerëz janë të bllokuar, pa energji elektrike, gaz apo ujë. Ushqimi dhe ilaçet po mbarojnë, pasi Rusia ka penguar dërgimin e ndihmave humanitare.
Katër ditë pasi mbërriti, tha Kate, forcat ukrainase arritën të dërgonin disa furnizime ushqimore dhe një kuzhinë në teatër dhe “filluam të gatuanim diçka”.
Autoritetet lokale thonë se të paktën 2,400 njerëz janë vrarë në Mariupol, megjithëse ata e pranojnë se kjo ka të ngjarë të jetë më e madhe. Shumë prej të vdekurve po varrosen në varre masive.
Pas largimit nga Mariupol, Kate u drejtua për në qytetin e Lviv, në Ukrainën perëndimore, një rajon që është kursyer kryesisht nga sulmet. “Ditën e parë pasi arritëm të dilnim, nuk mund të flisja. Ne të gjithë vetëm qanim, tha ajo. “Por tani duket sikur nuk ka mbetur më lot. Nuk mendoj se kjo dhimbje do të zhduket kurrë”. /abcnews.al
