Nga Erblina Mile
Biznesi i Bar-Restoranteve dhe hotelet e vlerësojnë të vonuar dhe të paqartë vendimin e komitetit teknik për heqjen e orës policore gjatë natës së ndërrimit të viteve. Zak Topuzi, përfaqësues i hotelerisë në Shoqatën e Turizmit thekson se shumë subjekte nuk arritën që të organizonin darkat pasi vendimi erdhi me vonesë. Por, pavarësisht kësaj vlerësojnë heqjen e kufizimit për këtë sektor.
“Ka qenë një urdhër që erdhi pak me vonesë, pati interferim interpretimesh. Urdhri ishte pak i paqartë. Një pjesë e hoteleve të mëdha i kanë anuluar për arsye të pamundësisë së organizimit”, thotë ai.
Por a do të festojnë shqiptarët jashtë shtëpisë në 31 dhjetor? Topuzi shprehet se ka pasur shumë kërkesa duke iu afruar trendit të periudhës para pandemisë edhe pse prenotimet rezultojnë 15 % më të ulëta.
Sektori i bar-restoranteve dhe hoteleria kanë qenë sektorët më të dëmtuar nga pandemia për shkak të kufizimeve. /abcnews.al
