Sergej Milinkovic-Savic është një nga lojtarët më të kërkuar dhe Lazio duhet të mendojë që ta shesë dhe të përfitojë sa më shumë. Igli Tare dhe presidenti Claudio Lotito duhet ta ndajnë mendjen, pasi edhe bisedimet për rinovimin e kontratës kanë ngecur.
“Gazzetta Dello Sport” shkruan se dy klube janë gati të bëjnë ofertë për shërbimet e serbit. Manchester United dhe PSG e duan, madje francezet mund të ofrojnë deri në 80 milion euro. Me siguri kjo shumë do ua prishë mendjen drejtuesve të Lazio, që shpesh kanë kërkuar mbi 100 milion euro për yllin e tyre.
PSG dhe United nuk janë të vetmet klube që interesohen për Milinkovic-Savic, pasi edhe Real Madrid dhe Chelsea janë në listën e klubeve që e pëlqejnë mesfushorin. Gjithsesi në këtë periudhë aspekti financiar është i rëndësishëm dhe jo çdo klub mund të bëjë çmenduri në merkato. /abcnews.al
